நெற்றிக்கண் தயவுத் தலைவர் முன்னுரை. ============================================== “கையறவி லாதுநடுக் கண்புருவப் பூட்டு கண்டுகளி கொண்டுதிறந் துண்டுநடு நாட்டு” (திரு அருட்பா) நாம் நெற்றியிலிருக்கும் நடுக்கண்ணை ஆசாரியர் அனுக்கிரகத்தால் திறக்கப் பெற்றுக் கொள்வது நலம். நெற்றிக் கண்ணைத் திறக்கப் பெற்றுக் கொண்டவனுக்கு எல்லா அனுபவங்களும் பட்டப்பகல் போல் தெரியும். அவன்தான் சுத்த ஞானி. மேற்படி ஞானி தயவோடு ஒரு பிரேதத்தைப் பார்த்த மாத்திரத்தில், பிரேதம் உயிர் பெற்றெழும். மேலும் ஞானிக்கு ஆன்மாக்களினது அபக்குவ பரிபாகத்தால் சினம் தோன்றினால் உட்னே அந்த ஜீவன் பஸ்பமாகி விடுவான். சுத்த ஞானிக்கு மேற்குறித்த அடையாளங்கள் உள. இந்த நெற்றிக் கண்ணைத் திறப்பதற்கு ஒரு கதவும் பூட்டும் உளது. மேற்படி பூட்டை அருள் என்கிற திறவுகோலைக் கொண்டு திறக்க வேண்டும். அருள் என்பது ஆன்ம இயற்கையாகிய பெருந்தயவு. நாம் தயா வடிவமானால் மேற்படி அனுபவம் நேரும். “ஆன்ம வாசமாகிய இந்தத் தேகமாகிய கிருகத்தில் அருட்பிரகாசமாம் தீபத்தை ஏற்றி வைத்து, மருளாகிய அஞ்ஞான இருளைப் போக்கி, பிராண நஷ்டம் இல்லாது என்றும் ஆனந்த மயமாய் இருக்க வேண்டும். - திரு அருட் பிரகாச வள்ளலார் – சுவாமி சரவணானந்தா அவர்களின் முன்னுரை. பிறவித் தொடரை நீக்கிக் கொண்டு, நிலையான வடிவில் நிலைத்து நின்றொளிர தேகப் பற்றறவும், ஆன்மப் பற்றுண்டாகவும் வேண்டியுள்ளது. இதற்கு - முதலில் இந்த நெற்றிக் கண்ணைப் பெற்றுக் கொள்ள வேண்டியிருக்கின்றதாம். நெற்றிக் கண் என்பது உப நயனம், ஞானக்கண், ஆன்மக்கண் என்பர். இது உபயம் (இரண்டு) ஆகிய வலது, இடது கண்களுக்கு இடையில் வெளிப்படவுள்ளதால், மூன்றாம் கண்ணென்றும் மொழியப்படும். நாம் பெற்றுள்ள புறக்கட்புலனால் புற உலகக் காட்சியைக் காணலாம். இக் கண்ணால் காணும் காட்சிப் புலனின்பம், மனதில் பதிந்து நின்று நினைவில் வெளிப்படும் தோறும் மனோ வெளியிலும் தோன்றி மறையும். அருட்செயல் உண்மையும் காணச் செய்வது புருவமத்திய ஞான உணர்ச்சிக் கண் என்னும் உபநயனம். இக் கண்ணே மனிதனுக்கு அபயம் அளித்து ஆனந்தம் அருள்வதாம். தயாஞான சோதித் தீபம் சிரநடுச் சிற்றம்பலத்தே ஒளிவிட்டிலங்குகிறது. இதனை, அறிந்து அடைய, இரு கண்ணுக்கு இடையுள்ள லலாடத்தில் ஒருமையுடன் இருந்து, உள்நோக்கிப் பாவித்து சிரநடு உணர்ந்து போற்றிப் பணிதல் வேண்டும். இப்படிப் பணிவதால் “தான்” என்ற போத நாசமுண்டாம். அப்போது அவ்வொளியே தானாகி நிற்கலாம். இப்படி அந்த ஞான தீப மயமாகி நின்று தேகப்பற்றற்று தயானந்தம் வளர் செயல் புரிந்து கொண்டு வாழ்வதே இவ்வுபநயனத்தால் பெறும் பெரும் பயனாகும். எல்லா மனிதரும் நெற்றிக்கண் பெற்று தயவுடன் வாழ்க ! - தயா நேயன் சரவணானந்தா – - நெற்றிக்கண் கதவு திறக்க விண்ணப்பம் திருக்கதவம் திறவாயோ திரைகளெல்லாம் தவிர்த்தே திருவருளாம் பெருஞ்ஜோதித் திருவுருக் காட்டாயோ உருக்கியமு தூற்றெடுத்தென் உடம்புயிரோ டுளமும் ஒளிமயமே யாக்குறமெய் உணர்ச்சி யருளாயோ கருக்கருதாத் தனிவடிவோய் நின்னையென்னுட் கலந்தே கங்குல்பக லின்றியென்றுங் களித்திடச் செய்யாயோ செருக்கருதா தவர்க்கருளுஞ் சித்திபுரத் தரசே சித்தசிகா மணியே என்திருநட நாயகனே (திருவருட்பா) நெற்றிக்கண் திறத்தலால் அசுத்த உடம்பு சுத்த உடம்பாதல் நெற்றிக் கண்ணார் ஜோதியிதை நேய வுறவு கூட்டிற்றால் சுற்றித் திகழும் சுமையுருவம் சுட்ட நீறா கின்றதுவே கற்றை ஜோதி கற்பூரம் கமழும் உருவம் இதுவாதல் எற்றை கையோ என்றிங்கே ஏங்கி யிருத்தல் தவமேயோ ! (தயவுப்பாக்கள்) குளக்கண் மலர்ந்த ஜோதி மலர் குளக்கண் திறந்து நோக்கிட்டு அளக்க லற்று அதுவாகி அருளோ டகத்தே யிருக்குங்கால் துளக்க வுடலை யொழிக்கின்றேன் ஜோதி யுருவந் தரிக்கின்றேன் இளைத்த காம னுருவத்தை எரிக்கும் நுதற்கண் இதுவேயோ ! (தயவுப்பாக்கள்)