அருட்பெருஞ் ஜோதி தனிப்பெருங் கருணை

தெருட்பெரு மறிவால் சேர்ந்துகொள் வீரேல்

பொருட்பெரு வாழ்வு பொருந்திட லாகும்

இருட்பெரு மாயா விடங்கரை விட்டு

கடவுளின் சொரூப, ரூப சுபாவத்தையுணர்த்தும் ஓர் அருள் மொழியே உண்மை மந்திரமாகும். அதனை, எவர், தன் உள்ளத்தும், உயிரினும், உடலினும் செயல்படக் கொள்கின்றனரோ அவர்க்கு அம்மந்திரத்தின் பொருளான வாழ்வை வழங்கும். “அருட்பெருஞ்ஜோதி தனிப்பெருங் கருணை” மந்திரம் வள்ளலார்க்கு அருட்பிரகாச ஆனந்த வாழ்வை நல்கி உள்ளதாம். இது சத்தியம். நாமும் அந்நிலை பெறலாம். இதற்கு நம் சத்விசாரத்தால், இடங்கர் = முதலை அல்லது குடம் போன்ற ஓங்கார மூளைக்கு மேல் வெளிப்பட்டு தயாதீபச் சுடர்போல் நின்று ஒளிரவும், செயல்புரியவும் வேண்டும்.

வருவது எதுவோ வல்வினைப் பயனால்

மருவது வற்ற வாழ்வுவந் திடுமோ

வெருவது தவிர்த்து விரைந்துவந் திடுமின்

அருவுரு வாகும் அருளொளி வடிவு

வாழ்ந்திட வேண்டின் மனத்தவா வறுமின்

சூழ்ந்திடுந் தானே சுத்தசன் மார்க்கத்

ஆழ்ந்திடுங் கடலில் அலையுறு வங்கத்

தாழ்ந்திடுவீரே தலைவணங் குவீரே

மனத்தில் ஆசையொழித்து, அருள் ஒளிமயமாகி நின்றால் நல்லின்ப வாழ்வு தானே சூழும். இது சுத்த சன்மார்க்கப் பதியின் ஆணை. ஆழ்கடலில் அலைபட்டுக் கொண்டிருக்கும் கப்பலைப் போல அவலமுறும் உரிமை அன்பர்களே, தயாபெருஞ் ஜோதித் திருவடிக்கு முன் தலைவணங்கித் தாள் பணிந்து தயாநலம் பெற வாரீர்.

ஜோதியார்ந் திடுநற் சுகவெளி தனிலே

ஆதியுமந்த நிலையெலாம் அருளில்

வேதியன் றன்னை விழைவுட னடைமின்

பேதியா தென்றும் பிறங்கிடச் செய்வார்

அகச் சுகவெளியிலே சுத்தபொன் ஒளியுரு தரித்து, ஆதியந்த உண்மை எல்லாம் உணர்த்தி, அருள்கின்றார் நம்பதி. இவரே உண்மை வேதியன். வேதிக்கும் செயலால், மாற்றறியாத் தங்கமாய் மாற்றியருளும் செய்கையால், நம்மை அருட் பொன் வடிவாய் ஆக்கிட உள்ளார். இச் சுத்த வடிவொடு என்றும் விளங்கிடச் செய்வார். இது நம்பதியின் பிழைபடாத அருள் வாக்கு ஆகும்.

இதுநம தண்ணல் என்னுளே யிருந்து

பொதுவிலே யன்று புண்ணியர்க் குரைத்த

வதுவைசெய் கின்ற நாழிகை யிங்கே

அதுவுனக் குரிய அருண்மண வெல்லை

நமது அண்ணலார், அன்றே அம்பலத்தில், புண்ணியர்க்காக உரைத்த வாக்கு, “இரண்டரைக் கடிகையில் திருமணம் கூடும்” என்பதாம். அன்று சொன்ன அவ்வாசகம், இன்று என் போன்றார் உள்ளத்திலும், ஒலியாது ஒளிரச் செய்கின்றதை இங்குறுவோர் கேளாது கேட்கலாம். இதனை இனிவரும் உலகம் மிக மதித்துக் கொள்ளப் போவது நிச்சயம்.

Content Ref: Dhayaa vilakka maalai